Parveen Shakir

apni rusavai tere naam ka charchaa dekhooN

apni rusavai tere naam ka charchaa dekhooN
ek zara sher kahooN aur main kyaa kyaa dekhooN

neend aa jaaye to kyaa mahfilein barpaa dekhooN
aaNkh khul jaaye to tanhai kaa sahra dekhooN

shaam bhi ho gai dhundhalaa gai aaNkhein bhi meri
bhoolane vaale main kab tak tera rastaa dekhooN

sab zidein us ki main pori karooN har baat sunooN
ek bachche ki tarah se use haNstaa dekhooN

mujh pe cha jaaye vo barasaat ki Khushbu ki tarah
ang ang apana usi rut mein mahakata dekhooN

tu meri tarah se yakta hai magar mere habib
ji mein ata hai koi aur bhi tujh saa dekhooN

main ne jis lamhe ko pooja hai use bas ek baar
Khvaab ban kar teri aaNkhon mein utarta dekhooN

tu mera kuch nahin lagtaa hai magar jaan-e-hayaat
jaane kyon tere liye dil ko dharakataa dekhooN

barish hui to phoolon ke tan chaak ho gaye

barish hui to phoolon ke tan chaak ho gaye
mausam ke haath bhiig ke saffaak ho gaye

baadal ko kyaa Khabar ki barish ki chaah mein
kitane buland-o-baalaa shajar Khaak ho gaye

juganu ko din ke vaqt pakarney ki zid karein
bachche hamaare ahad ke chaalaak ho gaye

lahra rahi hai barf ki chaadar haTaa ke ghaas
soraj ki shah pe tinkey bhi bebaak ho gaye

soraj dimaaGh log bhi iblaaGh-e-fikr mein
zulf-e-shab-e-firaaq ke pechaak ho gaye

jab bhi Garib-e-shahar se kuch guftagu hui
lahje hava-e-shaam ke nam-naak ho gaye

saahil pe jitney aab-guzidaa thay sab ke sab
dariyaa ke ruKh badalate hi tairaak ho gaye

chehara mera tha nigaahein us ki

chehara mera tha nigaahein us ki
Khamoshi mein bhi vo baatein us ki

mere chehare pe Ghazal likhti gayein
sher kahti hui aaNkhein us ki

shoKh lamhon kaa pata dene lagien
tez hoti hui saaNsein us ki

aise mausam bhi guzaare ham ne
subahein jab apani thi-n shaamein us ki

dhyaan mein us ke ye aalam thaa kabhi
aaNkh mahataab ki yaadein us ki

aaNdhiyaaN meri bahaarein us ki

neend is soch se Toti aksar
kis tarah kat-ti hain raatein us ki

dor rah kar bhi sadaa rahati hai
mujh ko thaame hoye baahein us ki

Gumaan

main kachchi neend mein hooN
aur apne neem-Khvaabidaa tanaffus mein utarti
chaandani ki chaap sunti hooN
gumaaN hai
aaj bhi shaayad
mere maathe pe tere lab
sitaare sabaat karate hain

vo to Khushbo hai havaaon mein bikhar jaayegaa

vo to Khushbi hai havaaon mein bikhar jaayegaa
masalaa phool ka hai phool kidhar jaayegaa

ham to samajhe thay ke ek zaKhm hai bhar jaayegaa
kyaa Khabar thi ke rag-e-jaaN mein utar jaayegaa

vo havaaon ki tarah Khana-bajaaN phirta hai
ek jhonkaa hai jo aayegaa guzar jaayegaa

vo jab aayegaa to phir us ki rafaaqat ke liye
mausam-e-gul mere aaNgan mein Thahar jaayegaa

aaKhirash vo bhi kahin ret pe baiThi hogi
teraa ye pyaar bhi dariyaa hai utar jaayegaa

Pyaar

abr-e-bahaar ne
phool kaa cheharaa
apane banafshi haath mein lekar
aise chumaa
phool ke saare dukh
Khushbo ban kar bah nikale hain

mushkil hai ab shahar mein nikale koi ghar se

mushkil hai ab shahar mein nikale koi ghar se
dastaar pe baat aa gai hai hoti hui sar se

barsaa bhi to kis dasht ke be-faiz badan par
ik umr mere khet thay jis abr ko tarase

is baar jo indhan ke liye kat ke giraa hai
chiryoon ko baraa pyaar tha us boorhay shajar se

mehnat meri aaNdhi se to mansoob nahin thi
rahna tha koi rabt shajar kaa bhi samar se

Khud apne se milne ka to yaaraa na tha mujh mein
main bheer mein gum ho gai tanhaai ke Dar se

benaam musaafat hi muqaddar hai to kyaa Gham
manzil kaa ta'yyun kabhi hotaa hai safar se

patharaya hai dil yuN ki koi ism parhaa jaaye
ye shahar nikaltaa nahin jaado ke asar se

nikale hain to raste mein kahin shaam bhi hogi
soraj bhi magar ayegaa is raah-guzar se

koo-ba-koo phail gai baat shanasai ki

koo-ba-koo phail gai baat shanasai ki
us ne Khushbo ki tarah meri paziraai ki

kaise kah dooN ki mujhe chor diya hai us ne
baat to sach hai magar baat hai rusvai ki

vo kahin bhi gaya lauta to mere paas aayaa
bas yahi baat hai achchi mere harjai ki

tera pahloo tere dil ki tarah abaad rahe
tujh pe guzare na qayaamat shab-e-tanhai ki

us ne jalti hui peshani pe jo haath rakhaa
rooh tak aa gai taaseer masihaai ki

kuch to hava bhi sard thi kuch tha tera Khayal bhi

kuch to hava bhi sard thi kuch tha tera Khayal bhi
dil ko Khushi ke saath saath hota raha malaal bhi

baat vo aadhi raat ki raat vo poore chaaNd ki
chaaNd bhi ain cheet kaa us pe teraa jamaal bhi

sab se nazar bacha ke vo mujh ko aise dekhate
ek dafa to rok gai gardish-e-maah-o-saal bhi

dil to chamak sakega kyaa phir bhi taraash ke dekh lo
shishagaran-e-shahar ke haath kaa ye kamaal bhi

us ko na pa sake thay jab dil ka ajeeb haal tha
ab jo palat ke dekhiye baat thi kuch mohaal bhi

meri talab tha ek shaKhs vo jo nahin mila to phir
haath dua se yuN gira bhool gaya savaal bhi

shaam ki nasamajh hava pooch rahi hai ik pata
mauj-e-hava-e-ko-e-yar kuch to meraa Khayaal bhi

us ke hi baazoun mein aur us ko hi sochte rahe
jism ki Khvahishon pe thay rooh ke aur jaal bhi

isi mein Khush hooN meraoa dukh koi to sahta hai

isi mein Khush hooN mera dukh koi to sahta hai
chali chalooN ki jahaaN tak ye saath rahataa hai

zameen-e-dil yuN hi shaadaab to nahin ae dost
qareeb mein koi dariyaa zaroor bahtaa hai

na jaane kaun saa fiqraa kahaaN raqm ho jaaye
diloon kaa haal bhi ab kaun kis se kahataa hai

mere badan ko nami kha gai ashkon ki
bhari bahaar mein jaise makaan Dahtaa hai