Momin Khan Momin

vo jo ham mein tum mein qarar tha tumhein yad ho ke na yad ho

vo jo ham mein tum mein qarar tha tumhein yad ho ke na yad ho
vohi yani vada nibaah ka tumhein yad ho ke na yad ho

vo naye gile vo shikayatein vo maze maze ki hikayatein
vo har ek bat pe rooThna tumhein yad ho ke na yad ho

koi bat aisi agar hui jo tumhare ji ko buri lagi
to bayaN se pahle hi bhoolna tumhein yad ho ke na yad ho

suno zikr hai kai saal kaa, koi vada mujh se tha aap ka
vo nibahne ka to zikr kya, tumhein yad ho ke na yad ho

kabhi ham mein tum mein bhi chah thi, kabhi ham se tum se bhi raah thi
kabhi ham bhi tum bhi the ashnaa, tumhein yaa ho ke na yad ho

hue ittefaq se gar baham, vo vafaa jataane ko dam-ba-dam
gila-e-malamat-e-arqabaa, tumhein yad ho ke na yad ho

vo jo lutf mujh pe thay beshtar, vo karam ke hath mere hath par
mujhe sab hain yad zara zara, tumhein yad no ki na yad ho

kabhi baiThe sab hain jo ro-ba-ro to isharaton hi se guftagu
vo bayan shauq ka barmala tumhein yad ho ki na yad ho

vo bigarna vasl ki raat ka, vo na mananaa kisi baat ka
vo nahin nahin ki har aan adaa, tumhein yad ho ki na yad ho

jise aap ginte thay ashnaa jise aap kahate thay bavafa
main vahi hooN "Momin"-e-mubtalaa tumhein yad ho ke na yad ho

Thaani thi dil mein ab na mileinge kisi se ham

Thaani thi dil mein ab na mileinge kisi se ham
par kya karey ke ho gayey nachaar ji se ham

ham se na bolo tum ise kya kahte hain bhala
insaaf kije poochate hain aap hi se ham

kya gul khilegaa dekhiye hai fasl-e-gul to door
aur so-e-dasht bhaagte hain kuch abhi se ham

kya dil ko le gaya koi begana ashnaa
kyuN apane ji ko lagte hain kuch ajanbi se ham

roya kareinge aap bhi pahroon isi tarah
roya kareinge aap bhi paharoon isi tarah

aTkaa kahin jo aap ka dil bhi meri tarah

na taab hijr mein hai na araam vasl mein
kambaKht dil ko chain nahin hai kisi tarah

gar chup rahein to Gham-e-hijraN se chuT jayeiN
kahte to hain bhale ki vo lekin buri tarah

na jaye vaaN bane hai na bin jaaye chain hai
kya kijiye hamein to hai mushkil sabhi tarah

lagati hain galiyaaN bhi teri mujhe kya bhali
qurbaan tere, phir mujhe kah le isi tarah

hooN jaaN-balab butaan-e-sitamagar ke haath se
kya sab jahaN mein jite hain "Momin" isi tarah

asar usko zara nahin hota

asar usko zara nahin hota
ranj rahat faza nahin hota

tum hamare kisi tarah na hoye
varna duniya mein kya nahin hota

narasai se dam ruke to ruke
main kisi se Khafa nahin hota

tum mere paas hote ho goya
jab koi dosara nahin hota

haal-e-dil yaar ko likhooN kyon kar
haath dil se judaa nahin hota

kyon sune arz-e-muztarib ae 'Momin'
sanam aaKhir Khudaa nahin hota